Bismilləhir-Rahmənir-Rahim
Orucun mənası:
"Siyəm"
lüğətdə tutub saxlamaq deməkdir. Şəri mənası isə fəcr doğandan gün batana qədər,
yemək, içmək və orucu pozan digər şeylərdən uzaq durmaqdır.
Orucun rüknləri:
1) Niyyət;
2) Orucu pozan şeyləri tərk
etmək.
Orucda niyyətin növləri:
1) Fərz üçün niyyət etmək: Fərz orucu üçün ikinci fəcrdən əvvəl niyyət etmək lazımdır. Ayın
başlaması ilə niyyət etmək kifayətdir. Niyyətin yeri qəlbdir. Dil ilə tələffüz
etmək bidətdir.
2) Nafilə üçün niyyət etmək: Nafilə oruc üçün günün istənilən vaxtı edilən niyyət səhihdir, amma bir
şərtlə ki, orucu pozan heç bir şeyi etməmiş olsun. Bu halda savab niyyət etdiyi
vaxtdan başlayacaq.
Orucun növləri:
1) Vacib oruclar (Ramazan, kəffarə, nəzir orucları kimi);
2) Nafilə oruclar.
Ramazan orucunun vacib olmasının şərtləri:
1) Müsəlman olmaq;
2) Ağlı başında olmaq;
3) Həddi-büluğa çatmaq (Seçim yaşında olan isə həvəsləndirilir və
valideynləri tərəfindən oruc tutmaq əmr olunur);
4) Səfərdə olmamaq (Müsafirə oruc vacib deyildir. Lakin çətinlik
yoxdursa tutması yaxşıdır, çünki bu Peyğəmbərin (Allahın ona salavat və salamı
olsun) etdiyi bir əməldir. Həmçinin insan tutmaqla vacibdən azad olur, həmçinin
bu mükəlləf üçün daha asandır və Ramazanda tutmaqla bu ayın savabını əldə etmiş
olur);
5) Sağlam olmaq;
6) Qadının heyzli və
nifaslı olmaması.
Xəstənin oruc tutması:
Xəstəlik iki qismə bölünür:
1) Sağalmayan xəstəliklər: Bunlar yaşlı və oruc tutmaqdan aciz olan insanların hökmündədilər. Belə
insanlara oruc tutmaq vacib deyil, lakin hər günün əvəzinə bir kasıbı yedirtməlidirlər.
İstər günlərin sayı qədər kasıbları bir yerə toplayıb onlara nahar yaxud şam
yeməyi versin, istər də yeməyi ayırıb günlərin sayı qədər kasıblar arasında
bölsün, hər kasıba 1/4 saa (510 qram) buğda versin. Yaxşıdır ki, bununla yanaşı ət
yaxud yağ da olsun.
2) Sağala bilən, lakin onunla bərabər oruc tutmaq çətin
olan xəstəliklər: Bu insanlar isə heyzli, nifaslı, səfərdə olan və
süd əmizdirən insanların hökmündədir. Sağalandan sonra oruc tutmadığı günləri qəza
edir. Əgər sağalmamış vəfat edərsə, ondan vaciblik düşər.
Ayın daxil olması nə ilə sabit olur?
Ramazan ayının daxil olması
ayı görməklə, yaxud Şaban ayını otuz gündən tamamlamaqla sabit olur.
Orucu pozan şeylər:
(Orucu
pozan şeylərdə cahil, unutqan və məcbur edilən kəslər üzrlüdürlər.)
1) Qəsdən yemək yaxud içmək. (Kim unudaraq yeyib, içsə orucu səhihdir);
2) Cinsi əlaqədə olmaq. (Əgər oruc ona vacib olduğu halda Ramazanda günorta vaxtı bunu edərsə,
onun üzərinə kəffarə vacib olar. Kəffarə də bir qul azad etməkdir, əgər bunu edə
bilməsə altımış gün ardıcıl oruc tutmalıdır, əgər bunu da etməyə qadir olmasa
altmış kasıbı yedizdirməlidir.);
3) Qucaqlaşmaq, öpüşmək və s. bu kimi şeylər səbəbilə
spermanın çıxması;
4) Yemək və içmək hökmündə olan şeylər. Məsələn:
qidalandırıcı iynələr kimi. (Amma iynə
qidalandırıcı olmazsa, yəni, tərkibində vitamin olmazsa orucu pozmur);
5) Qan aldırmaq (Lakin
analiz üçün az miqdarda qan vermək orucu pozmur.);
6) Qəsdən qusmaq;
7) Heyz və nifas qanının gəlməsi.
Orucda müstəhəb olan şeylər:
1) Səhur etmək;
2) Səhuru axır vaxtına qədər gecikdirmək;
3) İftarı tezləşdirib ilk vaxtında açmaq;
4) Yaş xurma ilə oruc açmaq. Əgər tapmazsa adi xurma ilə
açmaq. Yaxşıdır ki, xurma tək sayda olsun. Əgər xurma da tapmasa su ilə açsın, onu
da tapmasa qəlbi ilə oruc açdığına niyyət etsin;
5) Oruclu olanda və orucu açanda dua etmək;
6) Çoxlu sədəqə vermək;
7) Gecə namazını çoxaltmaq;
8) Quran oxumaq;
9) Ümrə etmək;
10) Oruclunun, onu söyən adama "mən
orucam" deməsi;
11) Qədr gecəsini ibadətdə
keçirmək;
12) Ramazanın axır on günündə
etikaf etmək.
Orucda bəyənilməyən əməllər:
1) Dəstəmaz aldıqda qarqara etmək (Ağız və buruna su almaq vacibdir. Lakin boğaza su getmək təhlükəsi
olduğu üçün qarqara etmək bəyənilmir);
2) Ehtiyac yoxdursa, yeməyin dadına baxmaq.
Qeyd: Oruclunun tüpürcəyi udması,
ehtiyac varsa yeməyin dadına baxması, yuyunması, misvakdan istifadə etməsi, ətirdən
istifadə etməsi və sərinlənməsi caizdir.
Orucda haram olan əməllər:
1) Oruclunun bəlğəmini udması haramdır, lakin udarsa
orucu pozulmur;
2) Həmçinin, orucunun pozulmasına əmin olmayanın zövcəsi
ilə öpüşməsi də haramdır;
3) Haram olan sözlər söyləmək;
4) Cahillik etmək (səfehlik
etmək və yumşaq olmamaq);
5) İftar etmədən iki gün ardıcıl oruc tutmaq.
Nafilə oruclar:
1) Ramazan orucunu tamamlayan üçün altı gün Şəvvaldan
oruc tutmaq. Yaxşıdır ki, Şəvvalın ikinci günündən başlayaraq ardıcıl olaraq
tutsun;
2) Həccdə olmayan üçün Arafa orucunu tutmaq;
3) Aşura orucunu (Məhərrəm
ayının 10-u) oruc tutmaq. 10-u ilə bərabər 9-cu yaxud 11-ci günləri də
tutmaq;
4) Hər həftənin birinci və dördüncü günü oruc tutmaq;
5) Hər hicri ayından üç gün oruc tutmaq. Yaxşıdır ki,
bu, ayın 13, 14, və 15-ci günləri olsun;
6) Bir gündən bir oruc tutmaq (Davud əleyhissalamın orucu);
7) Məhərrəm ayında orucu çoxaltmaq;
8) Zilhiccə ayının doqquz gününü oruc tutmaq;
9) Şaban ayını tam tutmamaq şərti ilə bu ayın çoxusunu
oruc tutmaq.
Məkruh oruclar:
Cümə, şənbə, bazar günlərini
təkcə tutmaq bəyənilmir. Lakin səbəbli yerə təkcə tutarsa, caizdir. Məsələn,
Arafa orucu şənbə gününə təsadüf edərsə, o zaman tək tutur.
Haram olan oruclar:
1) Rəcəb ayını xüsusiləşdirib oruc tutmaq;
2) Şəkk günü (Şaban
ayının 30-u) oruc tutmaq. Lakin kiminsə davamlı tutduğu oruc həmin günə təsadüf
edirsə, həmin günü tutmaq olar;
3) Bayram günləri oruc tutmaq;
4) Təşriq günləri (Zilhiccənin
11,12,13-ü) oruc tutmaq. Lakin, kimsə həccdə kəsməyə qurban tapmasa, həmin
günləri tuta bilər;
5) İlin bütün günlərini oruc tutmaq.
Qeyd: Qəza orucunu ardıcıl tutmaq
müstəhəbdir. Yaxşıdır ki, bayram günündən həmən sonra tutmağa başlasın. Qəza
orucunu ikinci Ramazana qədər saxlamaq olmaz. Lakin üzrsüz yerə gecikdirərsə,
günah qazanır və üzərinə düşən isə yalnız həmin günləri qəza etməkdir.
Fitrə zəkatı:
Ramazanın axırıncı gününün məğrib
namazına yetişən hər bir müsəlmana fitrə zəkatı çıxarmaq vacibdir. Belə ki,
kimin evində Bayram günü və gecəsi özünün və ailəsinin yeyə biləcəyindən bir
saa (2,04 kq) artıq qalarsa, həmin adama özünün və ailəsinin əvəzindən
fitrə zəkatını çıxarmaq vacib olur. Ana bətnində
olan uşağın əvəzinə çıxarmaq isə müstəhəbdir.
Fitrə zəkatında hikmət
1) Oruclunun oruc vaxtı etdiyi boş söhbətlərdən və
günahlardan təmizlənməsi;
2) Bayram günü kasıbların ehtiyacını ödəməklə onların
dilənməsinin qarşısının alınması.
Fitrə zəkatının çıxarılma vaxtı
İcazəli vaxtı: Bayram
günündən bir və ya iki gün əvvəl çıxarmaq.
Müstəhəb vaxtı: Bayram
günü sabah namazından bayram namazına qədər çıxarmaq.
Haram vaxtı: Bayram
namazından sonra çıxarmaq.
Fitrə zəkatının miqdarı
Adəm övladının yediyi yeməklərdən
1
saa çıxarmaq lazımdır. Saa, arpa ilə ölçdükdə 2,04 kq edir.
Bayram namazı
Bayram namazı hər kəsə fərzdir.
Qılınma vaxtı Günəş bir nizə miqdarında qalxandan sonra başlayır. Əgər kim
namaza yetişməsə sonra qəza etmir. Bayram namazını səhrada, şəhər kənarında
qılmaq sünnədir. Məsciddə qılmaq da caizdir. Bayram günü ediləcək bəzi sünnətlər
vardır. Bunlardan:
1) Bayram namazına getməmiş tək sayda xurma yemək;
2) Gözəl şəkildə təmizlənib,
ətirlənib və ən gözəl paltarı geyinmək;
3) Bayram namazına bir
yolla gedib başqa yolla evə dönmək;
Qeyd:
Bayram günü namazdan sonra təbrikləşmək caizdir. Belə ki, hər bir müsəlman
qardaşlarını təbrik edib: "Təqabbəlallahu minnəə və minkum (Allah
bizlərdən də sizlərdən də qəbul etsin) deyir."
4) Bayram axşamı və bayram
günü məğribə qədər bayram təkbirləri gətirmək. Bunu fərzlərdən sonra etmək də
sünnətdir. Bayram təkbirləri belədir: "Allahu Əkbər, Allahu Əkbər, Ləə iləəhə
illallah, Vallahu Əkbər, Allahu Əkbər və lilləəhil həmd."
Bayram
namazı iki rükətdir. Birinci rükətdə yeddi təkbir gətirilir.
İkinci rükətdə isə ayağa durmaq üçün gətirdiyi təkbirdən başqa beş təkbir
gətirilir. Bayram günü xütbə namazdan sonra olur.
Müəllif: Şeyx Heysəm əs-Sərhən