BİSMİLLƏHİR RAHMƏNİR RAHİM ÖN SÖZ XUTBƏTUL - HACƏ
Həmd
ancaq Allahadır, Ona həmd edir, Ondan yardım və məğfirət diləyirik. Nəfslərimizin
şərindən və pis əməllərimizdən Allaha sığınırıq. Allah kimi hidayətə yönəltmişsə,
onu heç kəs azdıra bilməz, kimi də azdırmışsa, heç kəs onu hidayətə yönəldə
bilməz. Mən şəhadət edirəm ki, Allahdan başqa ibadət haqqına malik məbud[1] yoxdur, O, təkdir, şəriki də yoxdur və şəhadət edirəm ki, Muhəmməd Onun qulu və
elçisidir.
)يَا أَيُّهَا
الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا
وَأَنْتُمْ مُسْلِمُونَ(
"Ey iman gətirənlər! Allahdan lazımınca
qorxun. Yalnız müsəlman olduğunuz halda ölün” (Ali-İmran, 102).
)يَا أَيُّهَا
النَّاسُ اتَّقُوا رَبَّكُمُ الَّذِي خَلَقَكُمْ مِنْ نَفْسٍ وَاحِدَةٍ وَخَلَقَ
مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً وَاتَّقُوا
اللَّهَ الَّذِي تَسَاءَلُونَ بِهِ وَالْأَرْحَامَ إِنَّ اللَّهَ كَانَ عَلَيْكُمْ
رَقِيبًا(
"Ey insanlar! Sizi tək bir şəxsdən (Adəmdən) xəlq
edən, ondan da zövcəsini (Həvvanı)
yaradan və onlardan da bir çox kişi və qadınlar törədən Rəbbinizdən qorxun. (Adı
ilə) bir-birinizdən (cürbəcür şeylər) istədiyiniz Allahdan, həmçinin qohumluq əlaqələrini
kəsməkdən qorxun. Şübhəsiz ki, Allah sizin üzərinizdə nəzarətçidir” (ən-Nisa, 1).
)يَا أَيُّهَا
الَّذِينَ آمَنُوا اتَّقُوا اللَّهَ وَقُولُوا قَوْلًا سَدِيدًا يُصْلِحْ لَكُمْ أَعْمَالَكُمْ وَيَغْفِرْ
لَكُمْ ذُنُوبَكُمْ وَمَنْ يُطِعِ اللَّهَ وَرَسُولَهُ فَقَدْ فَازَ فَوْزًا
عَظِيمًا(
"Ey iman gətirənlər! Allahdan qorxun və doğru söz söyləyin! (Əgər belə etsəniz) Allah əməllərinizi islah edər və günahlarınızı bağışlayar. Hər kəs
Allaha və Peyğəmbərinə itaət etsə, böyük bir səadətə (Cənnətə) nail olar” (əl-Əhzab, 70-71).[2]
Şübhəsiz ki, sözlərin ən doğrusu Allahın kəlamı,
yolların ən xeyirlisi Muhəmmədin salləllahu
aleyhi və səlləm[3] yoludur. Əməllərin ən pisi sonradan uydurulanlardır. Sonradan
uydurulub dinə salınan hər bir əməl bidətdir,[4] hər bir bidət isə zəlalətdir.[5] Hər bir zəlalət isə oddadır.[6]
)قَالَ رَبِّ
اشْرَحْ لِي صَدْرِي وَيَسِّرْ لِي أَمْرِي وَاحْلُلْ عُقْدَةً مِنْ لِسَانِي يَفْقَهُوا
قَوْلِي(
"Ey Rəbbim! Köksümü açıb genişlət, işimi yüngülləşdir,
dilimdəki düyünü aç ki, sözümü yaxşı anlasınlar!” (Taha, 25-28).
Möhtərəm müsəlman bacı və qardaşlarımız!
İlk olaraq hamınızı Allahın salamı ilə salamlayırıq. Allahın Kitabına və Allah
Elçisinin salləllahu aleyhi və səlləm yoluna tabe olaraq bu əməli Allahın adı ilə, yəni "Bismilləh” ilə
başlayırıq.
Allah
Elçisi salləllahu aleyhi və səlləm Allahın Qurani-Kərimdə buyurduğu kimi: "O, öz istəyi ilə danışmır. Bu, ona təlqin edilən bir vəhydir” (ən-Nəcm, 3-4). Onun söylədiyi sözlər
arasında "qüdsi” deyilən hədislərə rast gəlinir. Qüdsi hədis həm ləfz,[7] həm də məna cəhətdən Peyğəmbərin salləllahu
aleyhi və səlləm Rəbbindən rəvayət etdiyi hədislərə deyilir. Hökm və
əqidə məsələlərini götürməkdə Quran və Sünnəyə bərabər tutulur. Qüdsi hədislər
barəsində bir çox alimlər fikir söyləmişlər. Şeyx İbn Useymin (rahiməhullah) belə demişdir: "Qüdsi hədislər mərtəbə etibarilə Qurani-Kərim ilə
Peyğəmbərin salləllahu aleyhi və səlləm hədisləri arasında bir yer tutmaqdadır. Çünki Qurani-Kərim həm ləfz,
həm də məna etibarilə Uca Allahdan, Peyğəmbərin salləllahu
aleyhi və səlləm hədisi isə həm ləfz, həm də məna etibarilə Peyğəmbərimizə
salləllahu aleyhi və səlləm aid edilir. Qüdsi hədis isə məna etibarilə Uca Allaha, ləfz etibarilə
isə Peyğəmbərə salləllahu aleyhi və səlləm aid edilir”.[8]
Qüdsi hədislərlə Quran arasında olan fərq
aşağıdakı kimidir:
1. Qurani-Kərim bütövlüklə mütəvatirdir, Qüdsi hədislər
isə belə deyildir.
2. Qurani-Kərim bütövlüklə səhihdir və onda heç bir xəta
yoxdur, qüdsi hədislərin arasında zəif, hətta batil və uydurma hədislərə rast
gəlinir.
3. Qurani-Kərim məxluq deyil, yəni yaradılmayıb. Qüdsi
hədislər isə Allah Elçisinin salləllahu aleyhi və səlləm sözləridir, yəni məxluqdur.
4. Qurani-Kərim həm məna, həm də ləfz etibarilə Allahdandır.
Qüdsi hədislər isə mənaca Allahdan, ləfz etibarilə Allah Elçisindəndir salləllahu aleyhi və səlləm.
5. Qurani-Kərim ayə, surə, hizb və cüzlərə bölünür,
qüdsi hədislər isə bunlara bölünmür.
6. Qurani-Kərimi oxuduqda onun hər bir hərfinə görə on
savab verilir, qüdsi hədislər isə belə deyildir.
7. Qurani-Kərim namazda oxunur, qüdsi hədisləri isə namazda
oxumaq olmaz.
Əziz oxucu! Bu hədisləri kitaba daxil edərkən
qarşımıza Peyğəmbərimizin salləllahu aleyhi və səlləm yalnız səhih isnadla rəvayət olunan hədislərini toplamaq məqsədini
qoymuşuq. Ona görə də kitaba salınan hədislərin böyük bir hissəsini Şeyx Muhəmməd
Nəsirəddin əl-Albaninin (rahiməhullah) təhqiq edib səhih
hesab etdiyi hədislər, eləcə də Şeyx əl-Albaninin (rahiməhullah) tələbəsi Əbu Usəmə Səlim ibn İyd əl-Hilalinin və mühəddis Şeyx Şueyb
əl-Arnavutun (rahiməhullah) təhqiq edib səhih
saydığı hədislər təşkil edir. Oxşar məzmunlu hədislərin çoxunu kitaba daxil etməyib
onlardan daha dolğun olanını yerləşdirməklə kifayətləndik. Kitabın
hazırlamasında Əlixan Musayevin tərcümələrindən geniş şəkildə istifadə etdik. Kitabın
əlinizdə olan nüsxəsinə bir sıra əlavə hədislər qoyulmuş, müəyyən xətalar düzəldilmişdir.
Bu xeyirxah işdə əməyi olan və köməyini əsirgəməyən hər bir müsəlmandan
Allah razı olsun və onları Firdovs Cənnətinə daxil etsin! Allahdan bu əməyin
ana dilimizə dolğun və düzgün şəkildə tərcümə olunub ərsəyə gəlməsini, Onun
üçün ixlaslı olmasını, bizdən qəbul edib onunla müsəlmanları
faydalandırmasını diləyirik. Əgər haradasa xəta etmişiksə bu nəfsimizdən və
şeytandandır. Diqqət! Allahın ad və sifətləri yalnız
Allaha xas və layiq olan şəkildə olduğu üçün onların necəliyi və keyfiyyəti barəsində
fikir yürütmək, düşünmək və ya danışmaq olmaz!
Güvəndiyimiz Allahdır, işlərimizi Ona həvalə
edir və Ona arxalanırıq. Həmd yalnız Onadır. Müvəffəqiyyət bəxş edən və xətalardan
qoruyan Odur.
)الَّذِي
خَلَقَنِي فَهُوَ يَهْدِينِ وَالَّذِي هُوَ يُطْعِمُنِي وَيَسْقِينِ وَإِذَا
مَرِضْتُ فَهُوَ يَشْفِينِ وَالَّذِي يُمِيتُنِي ثُمَّ يُحْيِينِ وَالَّذِي أَطْمَعُ أَنْ
يَغْفِرَ لِي خَطِيئَتِي يَوْمَ الدِّينِ رَبِّ هَبْ لِي حُكْمًا وَأَلْحِقْنِي
بِالصَّالِحِينَ وَاجْعَلْ لِي لِسَانَ
صِدْقٍ فِي الْآخِرِينَ وَاجْعَلْنِي مِنْ وَرَثَةِ جَنَّةِ
النَّعِيم(
"Məni yaradan və məni doğru yola yönəldən Odur! Məni yedirdən də, içirdən
də Odur! Xəstələndiyim zaman mənə yalnız O, şəfa verir. Məni öldürəcək, sonra
dirildəcək də Odur və Qiyamət günü xətamı bağışlayacağına ümid etdiyim də
Odur! Ey Rəbbim! Mənə hikmət bəxş et və məni salehlərə qovuşdur! Sonra gələnlər
arasında mənə yaxşı ad qismət et! Məni Nəim Cənnətlərinin varislərindən et!” (əş-Şüəra,
78-85).
Allahın salavat və salamı Onun Peyğəmbəri
Muhəmmədə, onun ailə üzvlərinə, səhabələrinə və Qiyamətə qədər
onun yolu ilə gedən əməlisaleh möminlərin üzərinə olsun!
Fevral 18 / 2011, Rabiul-Əvvəl 16 / 1432
Redaksiya heyəti
__________________________________________________
[1] - Məbud – ibadət olunan. [2] - XUTBƏTUL-HACƏ adı ilə məşhur olan bu duanı Peyğəmbər (sallallahu aleyhi və səlləm) cümə və s. xütbələrdə oxumuş, səhabələrinə bunu əmr
etmiş və özü də onları öyrətmişdir. Hədisin ilk hissəsini rəvayət etmişlər: Əhməd,
1/ 392, 293, 432; Əbu Davud, 2188; ət-Tirmizi, 1105; İbn Macə, 1892. - Ona Allahın salavatı və salamı olsun. - Bidət - yenilik, Muhəmməd
Peyğəmbərin (sallallahu aleyhi və səlləm) vəfatından sonra insanlar tərəfindən dinə salınmış ibadət növləridir. - Zəlalət - azğınlıq, yolunu azmaq. - Hədisin ikinci hissəsini rəvayət etmişlər: Muslim
"Şərhu Nəvəvi” 6/ 153-156; Əhməd, 3/ 319, 371; ən-Nəsai, 3/ 188, 189. Hədis
alimi Muhəmməd Nəsirəddin əl-Albani hədisin bütün rəvayətlərini bir yerə
toplayaraq "Xutbətul-Hacə” adlı bir kitab yazmışdır. İstəyənlər bu kitaba baxa
bilərlər. Hədis Şeyx əl-Albani tərəfindən səhih hesab olunur. - Ləfz
- rəvayət, mətn. [8] - Muhəmməd Salih əl-Useymin "Mustalahul-Hadis” səh.
10-11.
|