1. Ənəs[1] (radıyallahu anhu) rəvayət edir ki, Allah Elçisi (salləllahu aleyhi və səlləm) demişdir: "Elm öyrənmək hər bir müsəlmana fərzdir. Həqiqətən, hər şey, hətta dənizdəki balinalar belə elm tələbəsi üçün bağışlanma diləyirlər.”[2]

2. Əbu Umamə əl-Bəhili[3] (radıyallahu anhu) rəvayət edir ki, Allah Elçisinin (salləllahu aleyhi və səlləm) yanında biri abid (ibadət edən), digəri alim olan iki kişidən bəhs edildikdə, Allah Elçisi (salləllahu aleyhi və səlləm) buyurdu: "Alimin abiddən olan üstünlüyü mənim sizin ən aşağı olanınızdan üstünlüyü kimidir.” Sonra Allah Elçisi (salləllahu aleyhi və səlləm) dedi: "Allah və Onun mələkləri, səma və yer əhli, hətta yu­vasındakı qarışqa və hətta balina belə insanlara xeyir öyrədənə salavat[4] edir­lər.”[5]

3. Qeys ibn Kəsir rəvayət edərək demişdir: Mədinə şəhərindən olan bir kişi Əbud-Dərdə[6] (radıyallahu anhu) Dəməşqdə olarkən onun yanına gəldi. Əbud-Dərdə (radıyallahu anhu) ondan soruşdu: "Ey mənim qardaşım! Səni bura gətirən nədir?” O: "Sənin Allah Elçisindən (salləllahu aleyhi və səlləm) bir hədisi rəvayət etməyin mənə gəlib çatmışdır.” - deyə cavab verdi. Əbud-Dərdə (radıyallahu anhu) soruşdu: "Ehtiyacını ödəməkdən ötrü gəlmədinmi?” O: "Xeyr.” - dedi. Əbud-Dərdə (radıyallahu anhu) so­ruşdu: "Ticarət etmək üçün gəlməmisən?” O: "Xeyr, sadəcə bu hədisi öyrən­mək üçün gəldim.” - deyə cavab verdi. Əbud-Dərdə (radıyallahu anhu) dedi: Allah Elçisini (salləllahu aleyhi və səlləm) belə buyurarkən eşidim: "Kim elm öyrən­mək məq­sə­dilə yola çıxarsa, Allah onu Cənnətin yoluna yönəldər. Həqiqətən, mələk­lər elm tələb edəndən məmnun olduqları üçün qanadlarını yerə sərərlər. Göylərdə və yerdə olan hər kəs, hətta sudakı balıqlar belə alim üçün istiğfar edər (bağışlanma diləyər). Alimin abid (ibadət edən) üzərindəki üstünlüyü, ayın ulduzlar üzərindəki üstünlüyü kimidir. Şübhəsiz ki, alimlər peyğəmbər­lə­rin varisləridirlər. Peyğəmbərlər qızıl və gümüş miras qoymamışlar, on­ların miras qoyduqları yalnız elmdir. Kim onu (elmi) götürərsə, artıq tükənməyən bir pay götürmüş olar.”[7]

4. Səd ibn Əbu Vaqqas (radıyallahu anhu) rəvayət edir ki, Peyğəmbər (salləllahu aleyhi və səlləm) demişdir: "Mənim üçün elm öyrənmək əlavə ibadət etməkdən daha se­vim­lidir.[8] Sizin ən xeyirli əməliniz isə şübhəli şeylərdən çəkinmə­yi­niz­dir.”[9]

5. Muaz ibn Ənəs (radıyallahu anhu) rəvayət edir ki, Peyğəmbər (salləllahu aleyhi və səlləm) bu­yurdu: "Kim hər hansı bir elm öyrədərsə, ona öyrətdiyi elmə əməl edənin savabı verilir və (bu elmə) əməl edənin savabından heç bir şey əskilmir.”[10]